ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានបង្ហោះរូបថតចំនួន ៣សន្លឹកដោយបានរំលឹកនឹកឃើញទៅដល់នាឡិកាមួយខ្សែដែលសម្ដេចពាក់តាំងពីនៅជាក្មេងវត្តរហូតក្លាយជារដ្ឋមន្ត្រីការបរទេសកម្ពុជាក្នុងឆ្នាំ១៩៧៩។
សម្ដេចតេជោបានលើកឡើងថាសម្ដេចនៅតែខិតខំស្វែងរកនាឡិកាដែលសម្ដេចបានពាក់នេះ។
សម្ដេចតេជោ ហ៊ុន សែន បានបង្ហោះលើបណ្ដាញទំនាក់ទំនងតេឡេក្រាមរបស់សម្ដេចថា៖ «បានត្រឹមរូបថត!ខ្ញុំបានខិតខំស្វែងរកនាឡិកាដែលខ្ញុំពាក់តាំងពីមុនសង្គ្រាមឆ្នាំ១៩៧០ហើយមកដូរជាមួយបងជា សុីម ក្នុងឆ្នាំ១៩៨២»។
សម្រាប់តេជោបានរំលឹកថាសម្ដេចបានទទួលរូបថតបីសន្លឹកនេះពីបណ្ដាញសង្គម ដោយបានរំលឹកថានៅក្នុងរូបថតនេះមាននាឡិកាដែលពាក់នៅដៃក្នុងរូបថតនេះគឺជានាឡិកាដែលសម្ដេចកំពង់ស្វែងរក។
សម្ដេចបានលើកឡើងថាដោយសារតែនាឡិកានេះហើយបានជួយសម្ដេចរួចផុតពីការដាក់ទណ្ឌកម្មពីព្រះសង្ឃក៏ដូចជាជួយសម្ដេចក្នុងដំណើរដ៏វែងឆ្ងាយរហូតក្លាយជារដ្ឋមន្ត្រីការបរទេសកម្ពុជានៅក្នុងឆ្នាំ១៩៧៩។
សម្ដេចថា៖ «នាឡិកានេះមានប្រវត្តិវែងឆ្ងាយតាំងពីខ្ញុំនៅជាក្មេងវត្ត។ប្រហែលចុងឆ្នាំ១៩៦៩ឬដើមឆ្នាំ១៩៧០ដោយសារព្រះសង្ឃស្តីបន្ទោសរឿងយកចង្ហាន់យឺត ខ្ញុំសម្រេចបោកកូនជ្រូកយកប្រាក់សន្សំបានប្រាក់ជាង៥០០០រៀលយកទៅទិញនាឡិកាម៉ាកទីតូនីមួយគ្រឿង។ ប្រហែលដើមខែមិនា១៩៧០ខ្ញុំបានយកនាឡិកានេះទៅប្តូរជាមួយហាងនាឡិកានៅស្រុកមេមត់ដោយយកម៉ាកទីតូនីដែលមានតម្លៃខ្ពស់ជាងរហូតដល់៨៧០០រៀលលុយជំនាន់នោះ(មាសមួយដំឡឹងតម្លៃ៣២០០រៀល)។ ដូចនេះនាឡិកានេះមានតម្លៃស្មើនិងជាង២ដំឡឹងមាសនាពេលនោះ។នាឡិកានេះបានជួយខ្ញុំច្រើនមិនឲ្យលោកស្តីបន្ទោសរឿងយកចង្ហាន់យឺតពិសេសបំរើការក្នុងកងទ័ពរហូតជារដ្ឋក្រសួងការបរទេស១៩៧៩.១៩៨០និងជាឧបនាយករដ្ឋមន្ត្រីរដ្ឋមន្ត្រីការបរទេស ១៩៨១-១៩៨២ មុនពេលប្តូរនាឡិកានេះជាមួយបងជា សុីមក្នុងឆ្នាំ១៩៨២»។
សម្ដេចតេជោគឺជាមនុស្សម្នាក់ដែលស្រឡាញ់នៅនាឡិកា សម្ដេចមាននាឡិកាជាច្រើនដែលមានតម្លៃខ្ទង់រាប់លានដុល្លារផងដែរ។ ក្នុងពេលដែលសម្ដេចជាប្រធានអាស៊ានឆ្នាំ២០២២ សម្ដេចក៏បានឲ្យក្រុមហ៊ុនកម្ពុជាមួយផលិតនាឡិកាសម្រាប់ផ្ដល់ជូនមេដឹកនាំអាស៊ាននិងមេដឹកនាំពិភពលោកដែលមកចូលរួមក្នុងកិច្ចប្រជុំនេះផងដែរដែលមួយគ្រឿងមានតម្លៃប្រមាណ ២៥ពាន់ដុល្លារ៕
